ಕನ್ನಡವೆಂಬುದು ಕೇವಲ ಭಾಷೆಯಲ್ಲ… ನಮ್ಮ ಅಸ್ಮಿತೆಯ ಉಸಿರು!

ಒಂದು ಮಗು ಮೊದಲ ಬಾರಿಗೆ ಅಮ್ಮ ಎಂದು ಕರೆದಾಗ ಆ ಶಬ್ದದಲ್ಲಿ ಪ್ರೀತಿಯಿರುತ್ತದೆ. ಆ ಮಗುವಿಗೆ ಜಗತ್ತನ್ನು ಪರಿಚಯಿಸುವ ಮೊದಲ ಭಾಷೆಯಲ್ಲೊಂದು ತಾಯಿಯ ಭಾಷೆ. ಬದುಕಿನ ಮೊದಲ ಅಳು, ಮೊದಲ ನಗು, ಮೊದಲ ಮಾತು, ಮೊದಲ ಕನಸು ಎಲ್ಲದರಲ್ಲೂ ಒಂದು ಭಾಷೆಯ ಭಾವನೆ ಬೆರೆತಿರುತ್ತದೆ. ನಮ್ಮ ಪಾಲಿಗೆ ಆ ಭಾಷೆ ಕನ್ನಡ!

ಕನ್ನಡವೆಂದರೆ ಕೇವಲ ಅಕ್ಷರಗಳ ಜೋಡಣೆಯಲ್ಲ. ಅದು ನಮ್ಮ ತಾಯಿಯ ಮಮತೆ, ಅಜ್ಜಿಯ ಕಥೆ, ಹಳ್ಳಿಯ ಮಣ್ಣಿನ ಸುವಾಸನೆ, ರೈತನ ಬೆವರಿನ ಹನಿ, ಕವಿಯ ಕಲ್ಪನೆ, ಹೋರಾಟಗಾರನ ಹಠ ಮತ್ತು ಕನ್ನಡಿಗನ ಆತ್ಮಗೌರವ. ಇಂತಹ ಕನ್ನಡದ ಹಬ್ಬವನ್ನು ಆಚರಿಸುವ ನವೆಂಬರ್ 1 ಕೇವಲ ಸಂಭ್ರಮದ ದಿನವಲ್ಲ, ನಮ್ಮ ಭಾಷೆಯ ಬಗ್ಗೆ ನಾವು ಎಷ್ಟು ಜವಾಬ್ದಾರಿಯಿಂದ ನಡೆದುಕೊಳ್ಳುತ್ತಿದ್ದೇವೆ ಎಂಬುದನ್ನು ಪ್ರಶ್ನಿಸಿಕೊಳ್ಳುವ ದಿನವೂ ಹೌದು.